جاك.برليانس.تيجو

يا جماعة انا محتاج لرائيكم ضرورى ويا ريت اللى يدخل يرد حتى لو بدعوة إن ربنا يهديني للأصلح
انا محتار جدا جدا بين التلات عربيات اللى هما البرليانس الfsv والجاكb15 والتيجو ودة طبعا لانهم هما اللى فى حدود السعر االلى اقدر عليه
ياريت اللى يعرف انهى افضل يدخل يقولى او لو حد عندة اى تجربة مع احدى العربيات السابقة ياريت نفيد بعض
وابقى شاكرجدا

بص هو دايماً الناس حاطة الثلاث عربيات دول في مقارنة بس كمان ضيف ليهم الـM11
وأنا واحد من الناس اللي متابعة المقارانات بينهم .. بس أنا مجربتش ولا واحدة فيهم

لكن خلاصة البحث في موضوعاتهم
أولاً علشان نكون متفقين هما كلهم صيني يعني لازم تكون مش حاطط في دماغك موضوع إن الصيني كله وحش علش تقدر تختار أو تشوف حاجة غيرهم لو مش حابب الصيني

ثانياً تحدد العربية المناسبة لإحتياجاتك يعني محتاج مساحة داخلية ولا شنطة واسعة ولا إرتفاع عن الأرض ولا جودة خامات وتقفيل ولا خدمة ما بعد البيع

لأن الموضوعات دي مش مجتمعة في عربية منهم

وأنا مش هقارن لكن هقول اللي أنا أعرفه من حوارات الناس عن العربيات دي
نبدأ بالتيجو عربية جميلة شكلاً مرتفعة عن الأرض تعطي إنطباع إنها تنتمي لفئة أغلى من تمنها لكن العجيب على كل هذا الحجم لم أشعر باتساع الصالون الداخلي للسيارة
و أنصحك الأول تشوفها في معرض المصرية اللي في المعادي .. نصيحة ماتشوفهاش في مكان تاني غير المصرية لأن المصرية عدد الناس اللي بتتفرج عليها كتير فبيستعملوا الأبواب كتير و بيركبوها كتير و شوف أثر الفرجة عليها مش هقولك أثر إستخدامها لأن أنا كنت معجب بيها جداً لحد مارحت المصرية و اتفرجت عليها هناك بصراحة إتصدمت لما شفتها
تحس إن الخامات ضعيفة جداً و الأبواب في منتهى السوء حتى الإطارات الجلد المحيطة بالأبواب كلها واقعة و الأبواب خشنة وبتعمل صوت و انت بتفتحها و مش بتقفل بسهولة و مش هكتب أكتر من كده هسيب باقي الحكم ليك لما تروح تشوفها.

أما الـ إم 11 عربية جميلة جداً شكل و خامات لكن توجد بعض عيوب التقفيل و توجد شكاوي كتير منها بالمنتديات ويمكنك البحث على النت عن موضوعاتها لتدرك كم المشاكل الموجودة بها وهناك كلام أن العيوب قد تم تلاشيها في الدفعات الجديدة لكن الله أعلم

الـ FSV عربية جميلة و تحس إنها رشيقة في تصميمها وخامات و تقفيل ممتاز وتوكيل يعتمد عليه ولكن يؤخذ عليها إرتفاع أسعار الصيانة و قطع الغيار وعلى فكرة من الحاجات اللي إتفاجئت لما شفتها و أنا بتفرج على العربية هي مساحة الشنطة .. واسعة جداً

أما بقى الجاك B15
عربية ممتازة فعلاً شكلاً و مضموناً و حتى الآن لا يوجد شكاوى منها بل كل الموجود في المنتديات شكر فيها و في الكماليات الموجودة فيها مقابل السعر بتاعها لكن هناك تخوف من قلة انتشارها فالسيارة مازلت جديدة بالسوق المصري ولا نستطيع الحكم عليها الآن لكن للأمانة آدائها حتى الآن مطمئن و أسعار قطع الغيار و تكاليف الصيانة معقولة جداً و على لسان مالكيها أن التوكيل لا يتواني في خدمة العميل
وأنا كنت في زيارة للتوكيل بتاعهم أو بمعنى أصح المعرض الرئيسي في شارع البطل أحمد عبد العزيز في المهندسين و عرفت منهم إن ثالث دفعة من موديل 2011 قد تم تسليمها مما يبشرنا خير في موضوع انتشارها

شكرا على ردك واهتمامك يا استاذ احمد
وانا استفدت كتير اوى من رد حضرتك
وافهم من كدة ان التيجو تقفيل وخامات سيئة
وان البرليانس اسعار قطع الغيار نار
والام 11 فيها عيوب
يعنى فى الاخر افضلهم الجاك بس بردوا فيها عيب قلة انتشارها
انا احترت اكتر

WLAHY ana shayaf an afdalhom hya al JAC B15 tb3an 3rbya shkl w t2fel gamda

انا متشكر جدا جدا يا استاذ سيد
وانا فعلا قررت انى اجيب اجاك ان شاء الله
ومتاسف انى اتاخرت فى الرد عليك
وبامر الله اول ما اجيب الجاك هكتبلكوا تقرير كامل عنها