فيات سيينا ولا رينو كليو ؟؟؟

أزيكم يا شباب
كل سنو وأنتم طيبين ورمضان كريم
أنا قدامي عربية فيات سيينا موديل 2001
1400 سي سي
حالتها ممتازو فابريكة بره وجوه

مش عارف العربية دي عاملة ايه في قطع الغيار
وايه عيوبها
وياترى كويسة في بعد البيع

أنا كنت خلاص نويت اشتري رينو كليو موديل 2003 عاملة 60 الف كيلو بس

على فكرة صاحب الفيات رافض يديني سعر وبيقولي اللي تقوله
وأنا مش عارف هي تسوى كام أسعارها ببتراوح من 30 وحتى 46 نفس الموديل على كونتاكت كارز

عاوز مساعدتكم

وانت طيب يا مينا
بص هو أنا كنت في نفس الحيرة زيك بالظبط

سألت على السيينا قالوا لي العربيه بجد ممتازه و في منها نوعين
1- 1600 وده انجيكشن كامل( 4 رشاشات )
و موتورها بيطلع 101 حصان واستهلكها جوه البلد 9.8 لتر/100كم وعلي الطريق (90كم/س) 5.5لتر/100كم
جنوط 14
2- 1400 وده حقن عند نقطه( رشاش واحد )
و موتوره بيطلع 70 حصان واستهلكها جوه البلد 8.5لتر/100كم و علي الطريق السريع (90كم/س) 5.5لتر/100كم
جنوط 13
2 زجاج كهرباء - باور-تكييف- سنتر
اما من نحيه قطع الغيار قطع غيار 1400 ارخص من 1600 لكن عموما كل قطع غيارها متوفره وموجوده
بس حذروني من جزء اسمه الدنجل وهو اللي ماسك العجلتين الخلفين ببعض وقالوا لي إن ده أغلى قطعة في قطع الغيار على ما أعتقد ممكن يتكلف 3000 جنية


بالنسبة للكليو
كل الموديلات بتاعت الرينو جميله جدا وناعمة جداً بس ليها عيبين اتنين بس
اولا قطع الغيار غاليه - ثانيا مش اى ميكانيكى بيشتغل فيها يعنى لازم شغلها يبقى فى التوكيل او فى مركز خدمه
وطبعاً ده مكلف شوية


يبقى رقم واحد لو ما عندكش مانع تروح مركز خدمة رينو أي مركز خدمة مش شرط التوكيل يعني شوف لو في حد قريب منك و ياسلام يا مينا بقى لو عديت عليهم قبل ما تشترى هما هيقولوا لك على كل حاجة لو لقيت إن تكاليف الصيانة تنفع معاك يبقى أحسن من السيينا لأني لقيت ناس كتير بتشتكي من سخونة العربية السيينا


لو تكاليف صيانة السيينا مش مناسبة معاك و لو السيينا سليمة و كشفت على الدنجل ولقيته سليم توكل على الله وخدها هي تعمل حوالي 37 دلوقت بس دي خليها رقم اتنين

وربنا يوفقك يا جميل

وانت طيب يا مينا

بعد الكلام الجميل اللي كتبه صديقنا عاطف أحب أضيف حاجة صغيرة هي إن عفشة الكليو أنعم بكتير من عفشة السيينا لأن السيينا مع ناس أعرف إنهم بيشتكوا من إن العفشة ناشفة شوية وفعلاً كان في منهم بيشتكى من السخونة
أنا عن نفسي سوقتها مرة واحدة مكنتش مركز في موضوع العفشة قد ما كنت مشغول في إحساسي إن العربية فيها حاجة غلط في الرؤية يعني أنا حاسس إن في حاجة أنا مش شايفها كويس ممكن يكون القايم الشمال قريب و ممكن يكون ارتفاع الشنطة مخليك مش شايف ورا العربية كويس
مش عارف هو عموماً أنا مكنتش مستريح للرؤية يمكن ده إحساس بيزول بالتعود علشان ما أظلمش العربية

شكرا يا عاطف عالمعلومات وشكرا يا محمد عالتجربة أنا ساعات برضه باحس ان العربية ابعادها غريبة شوية

الفكرة دلوقتي ان العربية دي اسعارها بتتراوح من 32 لحد 46 وده هايجنني
على أساس ايه وبتبقى نفس السنة او فرق سنة
انا كدة هاربط على 35 بقى عشان ابقى مسكت العصايا من النص

وشكرا كمان مرة عالمساهمة وعالنصيحة